Nga 38 komuna në të gjithë Kosovën, Lëvizja Vetëvendosje arriti të fitonte vetëm katër prej tyre, që të gjitha në balotazh. LVV fitoi në Gjilan, Podujevë, Kamenicë dhe Shtime por humbi Mitrovicën, Prizrenin dhe Prishtinën që në zgjedhjet e kaluara i kishte fituar.
Në analizën e rezultatit të arritur, kryesia e LVV thotë se “nuk kanë qenë të mira” duke përcaktuar si faktor pritshmërinë që kanë qytetarët ndaj kësaj force politike. “Nuk jemi përgjigjur sipas nevojës e pritjes popullore. Diku kemi qenë shumë larg e diku kemi qenë shumë afër fitores. Të gjithë kemi mundur të bëjmë më shumë. Diku me kandidatin, diku me programin, diku me komunikimin, diku me angazhimin”, thuhet në një komunikatë shpërndarë për mediat.
Sipas LVV ata janë ndëshkuar në këto zgjedhje edhe nga pandemia pasi ka kufizuar takimet me qytetarët. LVV e konsideron rezultatin një mesazh duke shtuar se tashmë e kanë marrë mësimin
“Këto zgjedhje kanë qenë mësim për ne. Pranojmë të nxjerrim mësime sepse politika është shkolla jonë e përhershme”, përfundon komunikata.
