Një lajm i madh për Shqipërinë dhe Maqedoninë e Veriut. Mediat në Shkup po flasin për një shpresë të re për zhbllokimin e situatës nga vetoja bullgare ndaj Maqedonisë së Veriut që pengoi rrugën e vendit drejt anëtarësimit në BE, e cila mori peng edhe Shqipërinë përderisa disa vende anëtare insistuan që të dy shtetet fqinjë të avansojnë së bashku drejt bllokut europian.
Mediat shkruajnë për një Non-Paper, përmbajtjen e të cilit thuhet se e njohin si autoritetet bullgare, ashtu edhe ato maqedonase, por ndoshta edhe liderë të tjerë të vendeve të tjera të rajonit.
Në dokument thuhet se “Integrimi i Ballkanit Perëndimor në organizatat europiane dhe euroatlantike përbën një çështje të sigurisë afatgjatë me prioritet të lartë.
Krahas Shkupit e Sofjes, mosbesim ka edhe në Beograd e Prishtinë, ndërsa Tirana ndihet e rrezikuar për shkak të sistemit joformal të lidhjes me Maqedoninë veriore në rrugën e integrimit europian, dhe është çështje kohe derisa t`i soset durimi edhe Athinës zyrtare e cila është nën veprimin e anestezisë politike nga Marrëveshja e Prepës, nënvizohet aty.
Dokumenti duket se përpiqet të ofrojë një zgjidhje për ngërçin e krijuar. Kështu, Bullgarisë do t`i jepen garanci për forcimin e konceptit të kombit-shtet duke njohur kontekstin historik për prejardhjen bullgare të qytetarëve të saj pa përjashtim. Kështu, vendi çlirohet nga frika se përmes të drejtave të pakicave do t`i rrezikohet siguria dhe stabiliteti afatgjatë.
Në Maqedoninë e Veriut nga ana tjetër do të përçohet konteksti i shoqërisë multietnike përmes fshirjes së narrativës bullgare. Bullgarët do të hyjnë në Kushtetutë njësoj si bashkësitë e tjera etnike e kësisoj, shoqatat bullgare do të fitojnë mbrojtjes dhe kujdes të veçantë nga shteti.
