GREQI– Një tjetër vrasje ka tronditur Greqinë! Një 30-vjeçar ka vrarë të dashurën e tij, vetëm 26 vjeç, duke e hedhur nga shkëmbi pas një debati që kishin zhvilluar së bashku. 26-vjeçarja Garyfallia u gjet e vdekur pardje në det, në zonën e Lygaria të Folegandros, ndërsa 30-vjeçari u prangos menjëherë duke pranuar edhe autorsinë e krimit.
Sipas autorit, ai dhe e dashura kohët e fundit kishin nisur grindjet e mëdha, që nuk i “duroi” dot më të premten. Ai tregoi se teksa po lëviznin me makinë kishin nisur që të ziheshin sërish. Ndaj dhe ai kishte parkuar në anë të rrugës, e nxorri jashtë makinës dhe e hodhi nga shkëmbi.
Pastaj ai u zhyt për ta gjetur, por kur vuri re se ishte pa ndjenja u largua menjëherë nga vendngjarja. Ekspertiza mjeko-ligjore tregoi se e reja kishte ndërruar jetë nga mbytja pasi ishte e paaftë për të notuar. Pra nëse i dashuri do ta kishte nxjerrë jashtë në atë moment, e reja do kishte mbijetuat.
Në ditë pas vrasjes së Garyfallias, një grua e pa burrin që endej në gjendje të keqe natën në një zonë shkëmbore në Lygaria dhe informoi Policinë dhe Rojet Bregdetare, oficerët e së cilës nxituan në vend. 30-vjeçari sapo pa Policinë dhe autoritetet e portit, filloi t’i gjuante me gurë, duke sharë dhe duke bërtitur”ishte moment i keq”.
Vrasja ka tronditur opinionin publik në Greqi, duke paralajmëruar protesta të grave dhe vajzave, të cilat shprehen se ndjehen të rrezikuara. Për më tepër që e gjitha ka ndodhur vetëm disa muaj pas vrasjes së Caroline Crouch nga bashkëshorti i saj, ngjarje që ende nuk është harruar nga grekët.
