Yield-et e bonove 12-mujore pësuan një rënie të mëtejshme në ankandin e kësaj jave.
Të dhënat e Bankës së Shqipërisë treguan se yield-i mesatar i ponderuar zbriti në 1.46%, nga 1.52% në ankandin e mëparshëm.
Yield-i i regjistruar në ankandin e kësaj jave shënon nivelin e ri më të ulët të dy viteve të fundit. Kurba në rënie e yield-eve shpjegohet kryesisht me gjendjen mjaft likuide të sektorit financiar në vend dhe interesin e lartë të investitorëve për të blerë instrumentet e borxhit të qeverisë.
Nga 8.14 miliardë lekë që ishte shuma e shpallur për financim nga Ministria e Financave, kërkesat totale në ankand arritën vlerën e 10.4 miliardë lekëve. Në veçanti, prorata (pjesa) e ofertave konkurruese të pranuara po qëndron në nivele të ulëta, me 28.14%. Ky tregues është rritur nga ankandi i fundit, kur pati prekur nivelin 7.99%, por sërish kjo nuk e ka frenuar rënien e yield-eve. Me sa duket, pritshmëritë e investitorëve janë ende në krahun rënës dhe kjo është reflektuar në ofertat që kanë paraqitur në ankand.
Këtë javë u zhvillua edhe ankandi i bonove tremujore, ku yield-i mesatar i ponderuar rezultoi 0.96%, me një rritje shumë të lehtë nga niveli 0.89% i ankandit të mëparshëm, që ishte zhvilluar në muajin maj. Në këtë ankand, Ministria e Financave shiti 858 milionë lekë bono dhe kërkesa ishte e njëjtë me shumën e shpallur për financim. Me sa duket, në ankand janë paraqitur vetëm mbajtësit e bonove të maturuara, që kanë zgjedhur t’i riinvestojnë shumat e mbajtura. Kjo kërkesë më e ulët nga tregu mund të shpjegojë rritjen, sado të vogël, të yield-eve për këto instrumente. Për shkak të kthimeve relativisht të ulëta dhe maturimit të shpejtë, bonot 3 dhe 6 mujore tërheqin më pak interes nga investitorët krahasuar me titujt më afatgjatë.
Gjendja e mirë e likuiditetit në treg dhe politika e ndjekur nga Banka e Shqipërisë, me nivel shumë të ulët të normës bazë dhe me akses të pakufizuar në likuiditet për bankat tregtare, ka bërë që pritshmëritë e aktorëve të tregut të ngelen të orientuara drejt ruajtjes së normave të ulëta të interesit në afatin e shkurtër. Sipas Bankës së Shqipërisë, ruajtja e stimulit monetar është e domosdoshme për të mbështetur rimëkëmbjen e ekonomisë nga efektet e rënda të krizës që solli pandemia.
Rënia e yield-eve është favorizuar edhe nga zhvillimet në krahun e ofertës së titujve. Për tremujorin e dytë të vitit, qeveria shqiptare planifikoi një huamarrje totale, duke përfshirë edhe rifinancimet, prej rreth 89 miliardë lekësh, nga pothuajse 97 miliardë lekë në tremujorin e parë. Kjo nënkupton një kërkesë në rënie për financim dhe më pak trysni për rritje të yield-eve. Për tremujorin e tretë kalendari i huamarrjes nuk është publikuar ende, megjithatë nuk pritet ndonjë luhatje që të mund të ndikojë shumë balancat e tregut.
MONITOR
