KOSOVË– Një bankomat i një filiali banke në Prishtinë është grabitur më dhunë. Zëdhënësi i Policisë për Rajonin e Prishtinës, Agron Borovci, ka bërë me dije se ngjarja ka ndodhur në orët e para të mëngjesit të sotëm.
Sipas njoftimit zyrtar, disa persona, ende të paidentifikuar kanë shpërthyer me tritol bankomatin për ta vjedhur. Ata kanë marrë paratë, por pasi kanë parë reagimin e rojes, i cili ka tentuar të lajmëroje autoritetet, kanë qëlluar dhe me armë zjarri.
Për fat të mirë, plumbat nuk kanë kapur asnjë person, duke mos shkaktuar dëme. Rruga “B” aktualisht është bllokuar për momentin duke shkaktuar edhe rradhë të gjata trafiku në zonë.
“Nuk raportohet për persona të lënduar. Derisa ekzaminimi po vazhdon në vendngjarje, hetuesit policorë janë duke punuar në identifikimin dhe arrestimin e personave të dyshuar”, ka deklaruar zëdhënësi i Policisë për Rajonin e Prishtinës, Agron Borovci.
