Numri i kontratave të sigurimit të jetës së debitorëve këtë vit është në rritje, duke dhënë sinjale të mëtejshme të zgjerimit të kreditimit afatgjatë të ekonomisë.
Të dhënat nga Autoriteti i Mbikëqyrjes Financiare tregojnë se për 10-mujorin e këtij viti, numri i kontratave të sigurimit të jetës së huamarrësve arriti në mbi 49,500, në rritje me rreth 1.9% krahasuar me një vit më parë. Sigurimi i jetës së debitorit është gjithnjë e më shumë themeli ku mbahet tregu i sigurimit të jetës në Shqipëri.
Nga 100 polica sigurimi jete të shitura gjatë këtij viti, 69 i takojnë pikërisht këtij produkti. Ky fakt dëshmon më së miri varësinë e fortë që ka tregu i sigurimit të jetës në Shqipëri nga ky produkt, e cila është bërë edhe më e lartë në kushtet kur produktet e tjera janë ndikuar edhe më shumë nga kriza. Në 10 muaj, shqiptarët kanë paguar 614 milionë lekë, ose pothuajse 5 milionë euro për të siguruar kreditë që kanë në banka.
Sigurimi i jetës së debitorit është një produkt praktikisht i detyrueshëm, si kusht i bankave apo institucioneve të tjera të huadhënies për garantimin e kredive bankare afatgjata. Kontrata e sigurimit rinovohet çdo vit, deri në shlyerjen e plotë të detyrimit ndaj institucionit të huadhënies.
Rritja e numrit të kontratave nënkupton një rritje paralele të kontratave të kredisë bankare të këtij lloji. Ky sigurim është tipik sidomos në kredinë për blerjen e pasurive të paluajtshme nga individët, megjithëse banka të veçanta mund të kërkojnë një sigurim të tillë edhe për kreditë konsumatore, kur ato prekin vlera të konsiderueshme.
Rritja e kontratave të sigurimit të jetës është një tregues tjetër se kreditimi këtë vit, sidomos në segmentin retail, po ecën më mirë se parashikimet e zymta që u krijuan pas prekjes së vendit nga pandemia. Megjithëse në volume, këtë vit kredia e re paraqitet në rënie krahasuar me vitin 2019, rënia është përcaktuar sidomos nga mbyllja e ekonomisë në tremujorin e dytë.
Pas rihapjes, kreditimi i individëve i është kthyer shifrave të ngjashme me kohën para krizës. Madje, për periudhën korrik-tetor, vlera mesatare mujore e kredisë së re për individët është madje 9% më e lartë krahasuar me të njëjtën periudhë të vitit të kaluar. Shtysa kryesore ngelet kredia për blerjen e banesave, por një tendencë të ngjashme pozitive po shfaq edhe kredia konsumatore, që e ka kaluar shpejt goditjen që pësoi nga mbyllja e ekonomisë. Në tremujorin e tretë të vitit, kredia e re konsumatore u rrit me gati 50%.
Marrë nga Monitor.al
