Kosovë- Mërgim Lushtaku nga Partia Demokratike e Kosovës, ka dënuar atë që e ka konsideruar krim të organizuar brenda Ministrisë së Financave, kur ka folur për transferim e mbi 2 milionë eurove nga Thesari i Kosovës në një kompani private.
“Ditëve të fundit, qytetarët e Kosovës janë dëshmitar të një prej dështimeve më të mëdha të Qeverisë Hoti, në 20 vjet të jetës së institucioneve të Kosovës. Vjedhja e mbi 2 milionë eurove nga Thesari i shtetit në vetëm pak minuta është krim i madh i organizuar ndërinstitucional”, ka deklaruar ai në një konferencë për media.
Lushtaku, njëherësh deputet i Kuvendit të Kosovës, ka thënë se dorëheqja e Ministres së Financave, Hykmete Bajrami është akt i domosdoshëm.
Ai ka deklaruar se Qeveria e Kosovës ka tendencë të përfshijë PDK-në këtë rast.
“Asnjë i dyshuar deri më tani nuk është dhe nuk ka qenë anëtar i PDK-së”, ka thënë ai.
Lushtaku ka thënë se pretendimet e disa mediave në Kosovë se ortaku i tij është i përfshirë në këtë rast janë gënjeshtra. Labinot Gruda, punëtor i Thesarit të Kosovës, është arrestuar më 20 tetor, derisa dy persona të tjerë, pronarë të kompanisë private të cilës i është bërë transferi, gjenden në arrati.
Ministrja e Financave në Qeverinë e Kosovës, Hykmete Bajrami gjatë një raportimi të enjten para Komisionit Parlamentar për Mbikëqyrjen e Financave Publike, tha se transferi i mbi 2 milionë eurove nga Thesari i Kosovës në llogarinë e një kompanie private është realizuar përmes një krimi kibernetik.
Gruda, i dyshuar për transaksionin e paligjshëm mbi 2 milionë euro, ka deklaruar në gjykatë se ndihet plotësisht i pafajshëm dhe se pretendimet për këtë shumë parash “nuk kanë të bëjnë aspak” me të, raporton REL.
“Unë gjithmonë i kam përmbushur detyrimet e mija sipas përshkrimit të vendit të punës dhe asnjëherë nuk i kam tejkaluar ato”, ka thënë ai.
Sipas deklaratës së prokurorit të rastit, Labinot Gruda më 9 tetor mes orës 12:11 dhe 12:19 nga zyra e tij në Thesarin e Kosovës, “duke krijuar user-a (llogari) të ndryshëm si user-a të punëtorëve të Ministrisë së Infrastrukturës dhe të njëjtat i ka përdorur në mënyrë të kundërligjshme, ka realizuar katër transaksione në vlerë prej 2,077,995 në llogarinë bankare të kompanisë ‘LDA Group’ Sh.p.k… veprime të cilat i kanë shkaktuar dëm buxhetit të Republikës së Kosovës”.
Tre ditë më parë në Kosovë janë vjedhur nga Thesari i Shtetit 2 milionë euro. Ministrja e finacave Hykmete Bajrami ka dalë në një koferencë për shtyp ku ka treguar se parat e ndara në 4 transaksione janë dërguar në llogarinë e një operatori ekonomik. Ndërkohë janë tre të dyshuar, njëri prej tyre është Labinot Gruda, i cili është arrestuar, dy të tjerët janë pronarët e kompanisë operative “LDA Group” Sh.P.K, dhe janë arratisur. Prokuroria e Shtetit ka deklaruar se e gjithë vjedhja ka ndodhur për 8 minuta. Në dosjen e Prokurorisë së Shtetit thuhet se Gruda për një periudhë kohore prej tetë minutash ka bërë transferimin e mbi dy milionë eurove në llogarinë e kompanisë LDA Group Shpk me bazë në Llapushnik. Sipas avokatit mbrojtës, Gruda në zyrën e tij ka qenë edhe me 12-13 persona të tjerë. Ndërkohë, dy pronarët e kompanisë LDA Group K.Sh dhe V.Sh, dyshohet se janë duke u fshehur në Turqi.
